आमचं डिपार्टमेंट म्हणजे कॉलेजची ऍनेक्स बिल्डिंग.
सी आकाराची. दोन मजली, दगडी इमारत.
सी आकाराच्या पोटात लांब व्हरांडा.
व्हरांड्याला खालपासून वर पर्यंत लोखंडी चौकोनी जाळी.
समोर अशोकाची टोकदार झाडं.
एकमेकांसमोर तोंड करून उभे असलेले सायकल स्टँड.
इमारतीच्या बरोबर मध्ये भल मोठ्ठं दार.
दारासमोर पटांगणात एक बंद असलेला कारंजा.
त्याभोवती लोखंडी कंपाऊंड. एक तुटकं गेट. आतली झाडं झुडपे वाळलेली.
कागदांचे बोळे इकडे तिकडे.
सायकल स्टँड वर मोजक्याच बाईकस्.
मुलींच्या स्कुटी, एम एटी आणि सायकली.
पटांगणात एक स्कुटर.
पांढऱ्या रंगाची मारुती 800.
तिरपी लावलेली एक बॉक्सर.
आणि सायकल स्टँड वर बसलेले आम्ही.

इतर पोस्ट्स